Mar 8 | LBB | STEP | Na tinine pukakiarla ning, a tnan kunum a tarai la hanot taum, pa belal utna na hangan sur lar ieni. E Iesu i kabah pas anuna kakak a asasaerla teteki pa i atai la mang,

Mark 8

E Iesu i tabar diat arip a barsanla

(Mt 15:32-39)

1 Na tinine pukakiarla ning, a tnan kunum a tarai la hanot taum, pa belal utna na hangan sur lar ieni. E Iesu i kabah pas anuna kakak a asasaerla teteki pa i atai la mang, 2 “A maris kol a taraila ne, ning la ka kes taum on dala te natol a pukakiar, pa belal utna na hangan ning lar ieni. 3 Ning ar sune sen la sur anunla na hanhanua taum ana munurak, lar matpalpal amon ka ting na ngas, anasa dingla on la, la hanot miting na bakbak.”

4 Anuna kakak a asasaer la dekeni mang, “Mitaha al utna na hangan sur dalar tabar la ono? Anasa a hanua bel ka ine.” 5 E Iesu i deken la mang, “Naisa bret ning mulo losi?” La kelesi mange, “Dionomahis ka.”

6 E Iesu i sune a tarai la rop sur lar kes ting lapiu. I kubas pas dionomahis a bret, i atong wakak pas onoi tetek e God, i kibiki pa i sarani tana anuna kakak a asasaerla, sur lar tabar a taraila ono. Pa a kakak a asasaer la toli ot larning. 7 La los pas naisa na natnatara sis otleng, pa i atong wakak pas ono, pa i sarani sur lar asaurani tana taraila. 8 A tarai la hangan pa la masur. Lamur a kakak a asasaer la song bukus pas dionomahis a rat ana mah a utna na hangan. 9 A gurarala taum ana kakakla pa a taraila, la rop la hangan. A wawas ka ana barsanla i arlar ana diat arip. Pa lamur e Iesu i sune sen la. 10 E Iesu taum ana nuna kakak a asasaer la kas ting na mon, pa la han sur a papar Dalmanuta.

A Parisaiola la nunung e Iesu sur ir tol ta utna na kulkulan

(Mt 16:1-4)

11 A Parisaiola la hanot tetek e Iesu pa la arlak na warwara tataum ono. La mang sur lar toho i. La nunungi sur ir tol ta utna na kulkulan sur ir asangani mang ai mitisaot na langit. 12 E Iesu i ngoro pa i mang, “Sur asa a taun tarai ne la nunung sur ar tol ta akinalang? A atong momoli ta mulo, bel dir tol ta akinalang ta mulo.” 13 Pa i kas ulak ana mon, pa la han kusun la utumo na ris a puka tasi.

A wetewete ana is anuna Parisaiola pa e Herot

(Mt 16:5-12)

14 A kakak a asasaer la dumani sur lar los al bret, takai sot ning la losi ting na mon. 15 Pa e Iesu i warwara na wetewete tetek la mang, “Mulor wetewete ana is anuna Parisaiola pa e Herot.” 16 Pa la warwara taum ana kamkama warwara ane Iesu, pa la atongi mang, “I atongi larning, anasa belal bret andalai.” 17 E Iesu i tasman anunla warwara pa i atai la mang, “I mangasa ning mulo atongi manga belal bret? Bel mulo tasmani, pa belot mulo talapor? I mangmangasa ning mulo tagar a nuknukimulo sur gong mulo kubas anuk na asasaerla? 18 A matamulo i kes, ika bel mulo tai ono. A talngamulo kaning ika bel mulo longor ono. Mulor nuk pasi: 19 Ning a kibik dilima na bret tetek dilima na arip na barsanla, naisa rat ning mulo song pasi ana mah a utna na hangan?” La kelesi mange, “Ning a bonot pa pisir naur.”

20 Pa e Iesu i deken la mange, “Ning a kibik dionomahis a bret tetek diat arip a barsanla, naisa na rat ning mulo song pasi ana mah a utna na hangan?” La kelesi mange, “Dionomahis a rat.” 21 Pa i deken la mang, “Belot mulo talapor?”

E Iesu i atalapor a matanakut tisa e Betsaida

22 E Iesu taum ana kakak a asasaerla anunai la hanot tisa e Betsaida, pa a tarai la ben pas ning a matanakut teteki, pa la nunungi sur ir sua a kuna saot ono sur ir tai. 23 I tong pas a kuna kut, pa i ben maskani kusun a hanua. Ning ka namis tar naur a matana pa ka sua tar naur a kuna ono, i dekeni mang, “U ka oroi ta utna?” 24 Pa a barsan ning i tai tostos, pa i atongi mang, “A oroi a tarai lar a rakaila ning la han.” 25 E Iesu i sua ulak naur a kuna ona matanakut, pa a matana i talapor wakak bot, pa i oroi a utnala rop. 26 E Iesu i sune sen a barsan ning, pa i atai i mang, “Ur han tostos sur anum a rumai. Gong u han ting na tinine hanua.”

E Pita i warwara talapor o e Iesu

(Mt 16:13-20; Lk 9:18-21)

27 E Iesu taum ana nuna kakak a asasaer la han uting na hanhanua milau Sisaria Pilipai. Ning la han amon, i deken la mang, “A tarai la atongi mang iau esi?”

28 La kelesi mang, “Dingla la atongi mang u e Jon a Tena Baptais. Dingla la atongi mang u e Elaija, pa dingla otleng la mang u ning a halna dingla na propet.” 29 Pa i deken la mang, “Pa mulo ot mulo atongi mang iau esi?” Pa e Pita i kelesi mang, “U a Mesaia ning e God i sune sen u ute.” 30 Pa i sairas la mang gong la atai tar tik onoi.

E Iesu i warwara talapor nigo ana minat anunai

(Mt 16:21-28; Lk 9:22-27)

31 E Iesu i turpasi sur ir asaer anuna kakak a asasaerla mange, “A Nat a Barsan ir kilang a galis a mamahat, pa a ningnigola, pa a leklek na tena artabarla tetek e God, pa a tena asaerla tagun a Warkurai bel lar mang suri pa dir umkoli. Ning natol a pukakiar ir rop ir laun ulak.” 32 A warwara ne ane Iesu i talapor kol. Pa e Pita i ben masik pasi pa i warwara rakrakai ana i. 33 E Iesu i talingir pa i tai tetek anuna kakak a asasaerla, pa i warwara rakrakai tetek e Pita mange, “Satan, ur han utumo lamur kusun iau! Anasa u mur ka a nuknuk a taraila, pa bel u mur a nuknuk e God.” 34 E Iesu i kabah pas a kunum a taraila taum ana kakak a asasaerla teteki, pa i atai la mang, “Ning tik ir mang sur ir mur iau, gong i mur a nuknukna. Ir los pas anuna rakai kutus pa ir mur iau. 35 Esining ir tong akes anuna lalaun ir hirua, pa esining bel i tong akes anuna lalaun sur iau pa ana Wakak a Warwara otleng ir laun. 36 Ir wakak mangmangasa ning tik ir aslang arop pas a rakrakan hanua, pa ir alaulau a inguna ono? 37 Ir lou keles a inguna ana sa? Belal. 38 Pa tik ning ir meme hok pa anuk na warwara na matana taun taraila ning anunla lalaun i bakbak kusun e God pa la sira tol a toltol laulau, a Nat a Barsan otleng ir meme ono ning ir hanot taum ana nuna angelola pa a matatar anune Tamana.